Verdia de Finanza: cuncors per 17 aspirantes y aspiranc marescialli

L ie unì scrit ora n cuncors per personal cun l atestat de bilinguism - L ie l prim iede che l vën fat n cuncors tla rujenedes sibe tudëscia che taliana – Ejams tl raion dla provinzia de Bulsan  

BULSAN (USP). La cuoperazion sotscrita de dezëmber dl ann passà, da pert dl presidënt dla Jonta provinziela de Bulsan Arno Kompatscher y dl General Gavino Putzu, Cumandant regiunel dla Verdia de Finanza, unirà metuda n droa tla proscima enes. Ai 27 de auril ie l cuncors ufizialmënter unì scrit ora sibe per tudësch che per talian, n cuncors che à la fundamënta te atestazions de furmazion da mustré su y te ejams da fé. L cuncors ie per persones sot ai 26 ani cun l atestat de bilinguism. Chësc va debujën acioche 17 aspirantes y aspiranc marescialli posse fé pea pra l curs de furmazion per unì lascià pro tla „Scuola Ispettori e Sovrintendenti della Guardia di Finanza”, pra la Verdia de Finanza.

L ie l prim iede tla storia che l cuncors per crì ora marescialli ëi y ëiles ie resservà mé a candidates y candidac che sà da rujené, da liejer y da scrì sibe per tudësch che per talian. Oradechël unirà i ejams plu mpurtanc te Südtirol fac tla sëntes istituziuneles metudes a despusizion dala Provinzia Autonóma de Bulsan /Südtirol.

La candidates y i candidac, che muessa dlongia l atestat de bilinguism de livel B2 nce avëi l atestat finel de na scola auta, l ejam de maduranza, possa crì ora la rujeneda te chëla che i uel fé i ejams de cuncors. La rujeneda crissa ora ie da dé dant canche n fej dumanda per fé pea l cuncors.

La scumenciadiva che ie unida data pro dal Cumande Generel dla Verdia de Finanza ie l resultat de na cunlaurazion che à purtà i drë’ fruc danter la Provinzia Autonóma de Bulsan y l Cumande Regiunel Trentin-Südtirol dla Verdia de Finanza, che à la finamira de recruté, coche n dij, de tò su cunlauradëures ëiles y ëi nueves per la “Fiamme Gialle”, che ebe bele dal scumenciamënt inant duc i i presuposć damandei dala Provinzia de Bulsan per pudëi ti jì do a puntin al servisc. Tl medemo mumënt ti garantësciun ala zitadines y ai zitadins de rujeneda tudëscia la rejon y l dërt de se nuzé de si rujeneda dl’oma tl raport cun i ufizies publics tla provinzia.

La dumanda per pudëi fé pea pra l cuncors possa unì fata da persones che ne à mo nia cumplì i 26 ani. La dumanda scrita ora a puntin muessa unì data ju online nchin ai 27 de mei jan ite tla plata internet https://concorsi.gdf.gov.it. Sun la plata internet dla Verdia de Finanza www.gdf.gov.it iel oradechël da abiné i estrems dl cuncors scrit ora y duta la nfurmazions n con’ di presuposć per pudëi fé pea pra l cuncors. L Cumande provinziel dà nfurmazions n con’ dl cuncors o dl curriculum prufesciunel.

Do avëi finà via cun suzes l iter per unì lascià pro à la candidates y i candidac l mesun de fé pea pra l curs de furmazion de trëi ani tla „Scuola Ispettori e Sovrintendenti della Guardia di Finanza”. Do avëi stlut ju chësta furmazion giapa la candidates y i candidac l atestat, cun ejam stlut ju coche “Uperadëur Iuridich de Mpreja” (Operatore giuridico d’impresa).

A una y n acurdanza cun l’aministrazion provinziela y la Ntendënzes de Scola nvierà l Cumande provinziel de Bulsan ti proscimi dis via scumenciadives de nfurmazion, nce te scoles dla provinzia de Bulsan, per ti mëter a cuer y ti dé nfurmazions plu a puntin ala jëunes y ai jëuni n con’ dla ncëries y dla prufescion dla Polizia Ecunomica y de Finanza.

red/pio